బాలయ్య టికెట్ పేచీ.. బాబుతో గొడవ?

నందమూరి నటసింహం బాలయ్య వచ్చే ఎన్నికల్లో పోటీ చేయడం విషయంలో లొల్లి సాగుతోందని సమాచారం. తను వచ్చే ఎన్నికల్లో మళ్లీ హిందూపురం నుంచి పోటీ చేయాలని బాలయ్య భావిస్తున్నాడట. ఈ మేరకు బాలయ్య తన ఏర్పాట్లు చేసుకొంటూ ఉన్నాడు. అయితే బాలయ్య హిందూపురం నుంచి పోటీ చేయడం చంద్రబాబుకు సుతారమూ ఇష్టం లేదని వార్తలు వస్తున్నాయి. వచ్చేసారి హిందూపురం నుంచి తన తనయుడు లోకేష్ ను పోటీ చేయించాలి అనేది చంద్రబాబు లెక్కగా తెలుస్తోంది.

అయితే అల్లుడికోసం కూడా త్యాగం చేయడానికి బాలయ్య సిద్ధంగా లేడని.. తనే హిందూపురం నుంచి బరిలోకి దిగాలని ఆయన భావిస్తున్నాడని వార్తలు వస్తున్నాయి. ఈ నేపథ్యంలో ఈ పరిణామాల మధ్యన చంద్రబాబు, బాలయ్యల మధ్యన కోల్డ్ వార్ మొదలైందని టాక్ వినిపిస్తోంది.

హిందూపురం తనది అని బాలయ్య బాబుకు గట్టిగా చెప్పాలని అనుకుంటున్నాడని.. అందుకే హిందూపురంలో తాజాగా ఓటు హక్కును కూడా నమోదు చేయించుకున్నాడని సమాచారం. ఇన్నాళ్లూ బాలయ్య ఓటు హక్కు హైదరాబాద్ లో ఉండేది, ఇప్పుడు దాన్ని హిందూపురానికి మార్పించుకున్నాడు. తద్వారా తను హిందూపురంలోనే ఉంటానని చంద్రబాబుకు కూడా తేల్చి చెప్పినట్టుగా ఉన్నాడు బాలయ్య. అయితే బాలయ్య విజయవాడ ఏరియాకు వెళ్లి పోటీ చేసుకోవాలని.. హిందూపురం నుంచి మాత్రం బాలయ్య అల్లుడుకు ఛాన్స్ ఇవ్వాల్సిందేనని చంద్రబాబు నాయుడు అంటున్నాడట.